སུད་སི་ས་གནས་དབུས་གཙང་ཆོལ་ཁས་ལོ་གཅིག་གི་ལས་བསྡོམས་སྙན་སྒྲོན་ཞུས།

ཕྱི་ལོ་ ༢༠༢༢ ཟླ་ ༥ ཚེས་ ༡ ཉིན་རྒྱབ་ཆུ་ཚོད་ ༡༤།༠༠ ནས་ས་གནས་རི་ཀོན་ཚོགས་ཆུང་གི་ཚོགས་ཁང་དུ་དབུས་གཙང་མི་མང་འདུ་འཛོམས་ཀྱིས་ལོ་གཅིག་གི་བྱུང་སོང་བསྡད་གསུམ་གྱི་རྩིས་ཁྲ་དང་ལས་བསྡོམས་སྙན་སྒྲོན། དེ་ཉིན་རྩིས་པ་དང་དངུལ་གཉེར། རྩིས་དཔང་བཅས་ཀྱིས་རྩིས་ཁྲར་ཞིབ་གཤེར་མཐིལ་ཕྱིན་པ་གནང་ནས་མི་མང་ལ་སྙན་སྒྲོན་ཞུས། རྩིས་འགོ་འཇོག་སྟངས་དང་རྩིས་ཁྲ་ཁ་གསལ་བྱུང་ཡོད་པར་མི་མང་གིས་དགའ་བསུ་དང་བསྔགས་བརྗོད་ཞུས།  དེ་ནས་ད་རེ་ཉེ་ཆར་ཚོགས་གཞོན་ཕི་ར་ཝ་བཀྲ་ཤིས་དོན་གྲུབ་ལགས་རྡ་ས་དབུས་གཙང་དབུས་ཚོགས་ཆེན་དུ་ངོ་བཅར་ཞུས་ཡོད་པས། ཚོགས་ཆེན་གྱི་འབྲུ་དོན། སྤྱི་མོས་སམ་མང་མོས་གྲོས་ཆོད་གང་བྱུང་བ་དེ་དག་མི་མང་གིས་མཁྱེན་རྟོགས་སླད་སྒྲོགས་སྦྱང་གནང་། ད་ཆ་སུད་སི་ས་གནས་སུ་དབུས་གཙང་ཆོལ་ཁའི་རིག་གཞུང་ཟློས་སྒར་ཚོགས་པ་ཞིག་གསར་དུ་འཛུགས་ཐུབ་པ་བྱུང་ཡོད། དེ་ཡང་སིམ་ཞི་ཚང་ཀརྨ་ལགས་ཀྱིས་ལོ་མང་རིང་འགན་རྐང་བཞེས་དང་སྐུ་ངལ་བསྐྱོན་པའི་གྲུབ་འབྲས་ཆེན་པོ་ཞིག་ཡིན། གྲུབ་འབྲས་དེར་འདི་ག་ས་གནས་མི་མང་གིས་བསྔགས་བརྗོད་ཆེན་པོ་དང་། དབུས་ནས་ཀྱང་དགའ་བསུ་དང་བསྔགས་བརྗོད་ཀྱི་ཕྱག་བྲིས་ཤིག་བསྐུར་འདུག དེ་རྗེས་མི་མང་གི་དགོངས་ཚུལ་དང་དོགས་འདྲི་ཁག་ལ་ལན་འདེབས་ཀྱིས་ཕྱི་དྲོ་ཆུ་ཚོད་ ༡༧།༠༠ ཙམ་ཚོགས་འདུ་མཇུག་བསྒྲིལ།