མི་མང་ལྷན་འཛོམས།

སུད་སི་དང་ལིག་ཏེན་སིཊཡན་ས་གནས་དབུས་གཙང་ཆོལ་ཁ་དབུ་བརྙེས་ནས་མི་ལོ་སུམ་ཅུ་སོ་ལྔ་འཁོར་ལ་ཉེ། མི་ལོ་སུམ་ཅུ་ལྷག་རྒྱུན་གནས་ཐུབ་པའི་རྐྱེན་གཙོ་བོ་ནི། དབུས་གཙང་མི་རབས་བགྲེས་པ་དང་རྒྱུན་ལས་ཟུར་པ་རྣམས་ཀྱིས་ད་བར་ལས་འཁུར་རྒྱུན་སྲིང་གནང་བའི་བཀའ་དྲིན་ཁོ་ན་ཡིན་པ་སྨྲོས་ཅི་དགོས། འདི་ག་ཚོགས་པའི་ངོས་ནས་ལོ་ལྟར་ཆག་མེད་མི་མང་འདུ་སྐོང་དང་དབྱར་སྐྱིད། མཆོད་འབུལ་སྨོན་ལམ། ཆོལ་ཁོངས་མི་མང་ལ་ལོ་རེའི་ཚོགས་པའི་བྱུང་སོང་བསྡད་གསུམ་གྱི་རྩིས་ཕྲ་གསལ་བཤད་སོགས་གནང་མུས་ཡིན། ལོ་རེར་མཆོད་འབུལ་སྨོན་ལམ་དང་མི་མང་འདུ་སྐོང་ཞུ་བའི་དགོས་དམིགས་གཙོ་བོ་ཁག་ནི། ༧གོང་ས་༧སྐྱབས་མགོན་ཆེན་མོ་མཆོག་གི་བཀའ་དྲིན་རྗེས་སུ་དྲན་པ་དང་། ཆོལ་གསུམ་མི་རབས་བགྲེས་པ་རྣམས་ཀྱིས་གཙོས་བོད་རྒྱལ་ཁབ་དང་མི་རིགས། དེའི་ཆོས་དང་རིག་གཞུང་། སྐད་ཡིག་མི་ཉམས་རྒྱུན་འཛིན། ༧གོང་ས་མཆོག་གི་བཀའ་དགོངས་ལ་དབུ་འོག་དཔུང་འདེགས་ཞུ་མཁན་གྱི་སྲི་ཞུ་ལས་བྱེད་པ་དང་མི་མང་། དབུས་བོད་མིའི་སྒྲིག་འཛུགས་ཀྱི་སྲིད་བྱུས་དང་བླང་དོར་ལམ་སྟོན་གང་གནང་ལ་ཤར་བསྐྱོད་ཞུ་མཁན། གཞིས་བྱེས་མཉམ་འཛོམས་ཡོང་སླད་ལས་དོན་བསྒྲུབས་པ་དང་། བསྒྲུབ་མཁན་ཡོད་དོ་ཅོག་གི་བཀའ་དྲིན་རྗེས་དྲན་དང་ཡི་རངས་བསྔགས་བརྗོད་ཞུ་བའི་འདུ་འཛོམས་གལ་ཆེན་ཞིག་ཡིན།

ལོ་ལྟར་ཆག་མེད་འདི་ག་སུད་སི་དང་ལིག་ཏེན་སིཊཡན་ས་གནས་དབུས་གཙང་ཆོལ་ཁས་དབུས་གཙང་དབྱར་སྐྱིད་གོ་སྒྲིག་ཞུ་བཞིན་ཡོད། དབྱར་སྐྱིད་འདུ་འཛོམས་སུ་ཆོལ་གསུམ་བོད་མི། དེའི་གཉེན་གྲོགས། ནང་མི་སྤུན་མཆེད་སོགས་གང་མང་མཉམ་ཞུགས་གནང་བཞིན་ཡོད་པ་ནི་དགའ་འོས་པ་དང་མིག་དཔེ་སྟོན་འོས་པའི་དབྱར་སྐྱིད་དགའ་སྤྲོ་འཁོལ་བའི་མི་མང་འདུ་འཛོམས་ཤིག་ཡིན།

སུད་སི་དང་ལིག་ཏེན་སིཊཡན་ས་གནས་དབུས་གཙང་ཆོལ་ཁའི་རྒྱུན་ལས་ཀྱི་ངོས་ནས་ད་བར་ལྷག་བསམ་ཟོལ་མེད་ཀྱིས་ལམ་སྟོན་དང་མཐུན་འགྱུར་རམ་འདེགས་གནང་མཁན་བོད་མི་ཚང་མར་སྙིང་དབུས་ནས་ཐུགས་རྗེ་ཆེ་ཞུ།