དབུས་གཙང་ལོ་རྒྱུས་ཆེན་མོའི་ཕྱག་དེབ་དབུ་འབྱེད།

༄༅།། ༢༠༢༠ ཕྱི་ཟླ་ ༣ ཚེས་ ༣ ཉིན་སྔ་དྲོ་སློབ་དཔོན་ཟམ་གདོང་རིན་པོ་ཆེ་མཆོག་གིས་དབུས་གཙང་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག་རྡ་སའི་ནོར་བུ་གསོལ་མགྲོན་ཁང་དུ་དབུས་གཙང་ལོ་རྒྱུས་ཆེན་མོའི་ཕྱག་དེབ་དབུ་འབྱེད་མཛད་སྒོར་ཕྱག་དེབ་དབུ་འབྱེད་དང་། རྩོམ་སྒྲིག་པ་དང་སྦྱིན་བདག་སོགས་ལ་གཟེངས་བསྟོད། དེ་བཞིན་སྐུ་མགྲོན་གཙོ་བོའི་ཚུལ་དུ་གསུང་བཤད་བཅས་གནང་འདུག དབུས་གཙང་དམ་པ་ཆོས་ཀྱི་ཆོལ་ཁའི་སྤྱི་ཁྱབ་ལས་ཁང་གིས་དགའ་ལྡན་ཕོ་བྲང་ནས་ལོ་རྒྱུས་ཆེན་མོའི་པར་སྐྲུན་བདག་དབང་ཞུས་རྗེས་ལོ་ལྔའི་ནང་ལོ་རྒྱུས་རྩོམ་སྒྲིག་བྱས་ཡོད་པ་དང་། པར་སྐྲུན་གྱི་འགྲོ་གྲོན་སྨན་པ་བློ་བཟང་ལགས་དང་སྐལ་བཟང་དོན་ལྡན་ལགས་རྣམ་གཉིས་ནས་ཧིན་སྒོར་འབུམ་ ༢༠ ཡི་མཐུན་འགྱུར་རོགས་རམ་གནང་ཡོད་འདུག རྩོམ་སྒྲིག་འགན་འཛིན་གཙང་ཕྲུག་སྟོབས་ལགས་ནས་ལོ་རྒྱུས་རྩོམ་སྒྲིག་གི་བརྒྱུད་རིམ་ངོ་སྤྲོད་ནང་བོད་རྒྱ་ནག་གི་བཙན་ཟུང་བྱས་པ་ནས་ཟུངས་བོད་ཀྱི་དངོས་ཡོད་ལོ་རྒྱུས་ཀྱི་ཡིག་ཆ་ཕལ་ཆེ་བ་རྩ་མེད་བཏང་ཡོད་པ་མ་ཟད། ལོ་རྒྱུས་རྫུན་བཟོ་བྱས་ནས་ལོ་ལྟར་འདོན་འགྲེམ་བྱས་པ་ལས། བོད་རང་བཙན་ཡིན་པའི་ལོ་རྒྱུས་དང་། རྒྱལ་བ་པཎ་ཆེན་གྱི་ལོ་རྒྱུས་ངོ་མ་རྣམས་སྦས་གསང་བྱས་ཡོད་པ་དང་། ལྷག་པར་དུ་ཡུལ་དུས་གནས་བབ་ཀྱི་དབང་གིས་ས་གནས་ས་ཐོག་ཏུ་བསྐྱོད་དེ་བཅར་འདྲི་སོགས་བྱེད་ཐབས་མེད་པ་ནི། ད་ཐེངས་ཀྱི་ལོ་རྒྱུས་ཞིབ་འཇུག་གི་ཞན་ཆ་ཞིག་ཏུ་གྱུར་ཡོད་སྐོར་དང་། དབུས་གཙང་ལོ་རྒྱུས་ཆེན་མོ་འདིའི་ཁུངས་བཅོལ་ས་གཙོ་བོ་དེ་ཏུན་ཧོང་གི་ཡིག་ཆ་ནས་ཕྱི་ལོ་ ༡༩༥༩ བར་གྱི་བོད་ཀྱི་རྒྱལ་རབས་ལོ་རྒྱུས་དང་། བླ་མའི་རྣམ་ཐར་སོགས་ལོ་རྒྱུས་དེབ་ཐེར་ཆ་ཚང་དང་། དེ་བཞིན་བོད་ཀྱི་དཔེ་མཛོད་ཁང་ནང་གཅེས་ཉར་བྱས་ཤིང་བོད་ནས་ཁྱེར་ཡོང་བའི་ཡིག་ཚགས་རིགས་དང་། ཕྱི་ལོ་ ༡༩༥༩ ལོའི་རྗེས་ཀྱི་བཙན་བྱོལ་དུ་ཕེབས་པའི་གནད་ཡོད་མི་སྣ་རྣམས་ཀྱི་ངག་རྒྱུན་ལོ་རྒྱུས་དང་། བོད་ནང་གི་གནད་ཡོད་མི་སྣ་དང་ས་གནས་ས་ཐོག་ཀྱི་ལོ་རྒྱུས་ཡིག་ཆ། གཞན་ཡང་རྒྱ་ནག་གཞུང་རང་གིས་བོད་བཙན་འཛུལ་མ་བྱས་གོང་དང་རིག་གནས་གསར་བརྗེའི་རྗེས་སུ་བྱས་པའི་སྤྱི་ཚོགས་ཞིབ་འཇུག་གི་ཡིག་ཚགས་རིགས་བཅས་ལ་ཁུངས་བཅོལ་ནས་དེབ་བྲིས་སྐོར་བརྗོད་སོང་།